題目沉重，嚴重抗拒者慎入，見解唔同但係冇必要造成不必要紛爭。
啱啱見到有個post講緊年紀大嘅動物安樂死，喺繁忙嘅獸醫院做咗九年獸醫護士都叫做見盡大大小小嘅Case，尤其是呢幾年返夜晚急症，安樂死喺必講話題，都可以喺度分享一下有關安樂死嘅大小事
好多主人都會唔俾佢哋死，就算個狀態已經係甩皮甩骨、完全冇生活質素，總之就打死都唔放手，
一係話要自然死，
一係就話我唔要殺咗佢
佢哋冇諗過如果喺自然界佢一早死咗
只不過人類用醫療去夾硬延長佢哋壽命
當疾病去到不能逆轉，
醫療只係令佢哋苟延殘喘嘅時候，
其實圖添嘅只有痛苦
最近呢幾個月亦都多咗，
係一隻動物去到最後嘅階段嘅時候，
唔同嘅主人走來同我講要搵全心同佢傾吓計，
又或者自己聽到隻狗同自己講唔想走
就一個頻繁接觸動物，周不時聽到動物講嘢嘅業者，想借住呢篇文補充一下：
動物知道死亡，但係永遠唔會要求死亡，因為佢哋個智力未去到，所以每日睇咁多急症，個個主人都係話隻狗唔想走。
係呀，佢哋唔想走㗎（唔似人類咁樣識得要求離開世界），就算自己爛晒，唞唔到氣，嘔緊血水，主人虐待級別對待，乜嘢狀況都好啦，
動物（尤其是狗狗）愚忠，淨係識望住主人，唔識/唔會求死。
所以呢啲先係點解醫療去到盡頭造成受苦嘅時候，主人其實係有責任去俾佢安樂死，而唔係一直將醫療無限延長去增加佢嘅受苦時間。
先唔講狗狗辛苦，
因為去到一個階段其實藥物嘅幫助真係有限，
止痛藥有時真係處理唔到某個程度嘅疼痛
主人日常照顧辛苦
（更加多嘅係大家其實要返工，
根本照顧唔到年老動物嘅需要，
有啲關節問題起身需要人哋攙扶，
主人全日返工都唔喺度，
大小便都有問題嗰啲就大家都更辛苦）、
我更加多同主人講嘅係，
其實你見着佢越嚟越差都好辛苦
我好愛動物，所以我先做呢行，
獸醫都係真係好愛動物，先可以將自己嘅專業變做職業，冇醫生想醫錯動物，更加冇人想殺動物
（如果想殺動物真係唔會入呢行？
你估呢行人工高福利好咩？
定係對住最愛嘅動物老病死好好受？
抑或係對住力竭聲嘶、失去理智嘅主人好好玩？醫生都可能叫做高人工，
同埋佢哋講到咁上下可以離開，扔比姑娘
但係姑娘係真係愛
就算姑娘對你態度唔好都唔代表佢唔愛動物
好多姑娘係唔鍾意人類、唔識/唔想同人類溝通、或者佢已經比上一個主人激到傻咗）
但係有陣時大家明知動物已經走到盡頭，
主人點都唔放手，
放喺醫院度幾日直到佢半夜三間斷氣，
嗰段時間動物有幾辛苦，
不同模式嘅慘死，
做咗咁多年都仍然係歷歷在目。
如果你選擇唔俾佢安樂走，而且帶返屋企，
即將有機會面對嘅就係我平時面對開、
百萬分難受，見住佢苟延殘喘唔知幾耐，
然後最後終於斷氣，又或者捱唔知幾耐之後餓死
抽筋抽成個鐘頭終於斷氣
咁樣，好受咩？
更加多嘅主人返嚟同我講，
如果早啲俾佢走大家都唔使咁辛苦。
好多主人會走來問
1. 姑娘，你講到咁，咁如果佢行到盡頭我留唔留院啊？
如果佢都已經走到盡頭，要走就俾佢走
如果佢睇落去剩返少少時間，講緊係睇落去都最少仲有一至兩個星期，坦白講大家養佢咁耐，
佢嘅狀況其實大家心裏有數，
寧願同醫生攞藥返屋企，
book上門獸醫幫佢安樂走，過埋最後幾日，
無論動物定係主人都應該係最舒服，個心最好受
（小型動物比較難處理，因為始終要牽涉氣體麻醉，多數都要帶到醫院進行，但係其實更加多嘅動物並唔介意！佢介意嘅係重要嘅人有冇喺身邊！但係就算你唔喺身邊，佢都唔會怪你！因為呢個就係你嘅寵物）
2. 姑娘，咁我幾時先係適合俾佢走啊？
永遠以動物生活質素為優先，呢個係我嘅宗旨。
其餘嘅原因對我來講只係次要因素。
佢哋係我生命中太重要，
所以所有嘅唔捨得，宗教因素又好，家庭因素又好，乜都比唔上佢舒舒服服最重要。
乜嘢係生活質素啊？簡單來講
食得
瞓得
玩得（年紀大嘅動物我唔期待佢好玩得，但係最少行得走得，有基本自理能力）
沒有過分承受不必要嘅疼痛
以上缺一不可，少一樣我都會俾佢走
佢哋用咗一世陪我，佢開開心心舒舒服服先係最緊要，冇一隻動物應該承受不必要嘅疼痛
咩叫過分嘅疼痛？你設身處地諗吓如果發生係自己身上你就知㗎啦，唔好再話啲寵物幾勇敢，
佢哋有更好嘅選擇咩？
平時見啲動物group死都唔放手
話乜嘢會救到盡，點都唔會安樂死，
有陣時真係覺得好唏噓
有一種愛，叫做放手
唔係所有嘢拎喺手上面先叫做愛
花時間了解一下安樂死
佢係過量嘅麻醉藥，打完之後會好眼瞓，
跟住慢慢離開，成個過程一兩分鐘左右
坊間有啲說法話
1. 動物死唔眼閉
動物同人本身就唔同，除咗睡夢中離開，大多數都會張開眼，其實係得人類會合埋眼，其實臨走之前放眼望下世界唔好咩？
2. 死後抽搐
其實就算心跳停咗，神經電流反應未停晒，醫生確定佢離開咗之後都會有機會身體有少少郁動，聲帶會影響到叫一聲都唔出奇，尤其是抽筋底嗰啲動物更加容易會見到，但佢已經走咗㗎啦，其實唔存在辛唔辛苦
3. 佢死咗之後失禁
正常反應，離開咗之後所有肌肉放鬆，膀胱同埋括約肌都係一部份
因為長篇大論所以決定另外開個post
雖然收咗工，但係有陣時覺得呢啲資訊就係平時主人需要接觸嘅東西，一早接觸左，了解咗
未來就更加少動物需要喺臨終前不必要受苦
最後如果大家咁好心機睇晒成篇嘢
都好多謝大家咁好耐性
都希望呢篇文幫到有需要做決定嘅主人
Comentarios