一般而言，前主人棄養到本會前都唔會提及刺蝟有冇任何病歷，就算有，大多數佢地都會隻字不提。
另外遺棄既刺蝟我地都係聽前主人講大約幾歲，
獸醫都係根據牙齒同身體狀況估，
牙齒同身體狀況每隻唔同，所以大家都係估，
我地唯有根據前主人話佢幾多歲而同返新主人溝通，
感覺超過三歲的基本上未必rehome。
呢個亦係點解我地會留新黎既小朋友係本會起碼一個月做觀察，如果狀況許可，我地就會安排佢去新既屋企，
但究竟我地會檢查乜野呢？
出呢篇文既原因係想主人多啲了解我地既運作同對疾病既分析，唔好有一個誤解，覺得係我地到領養刺蝟就100%健康，
科學上係冇100%既野，以下會詳細講解:
我哋一般係由獸醫護士進行檢查，基本 - 冇明顯貧血、 - 血色素良好、 - 冇脫水、 - 體型正常、 - 皮膚冇皮屑冇異樣， - 冇皮膚寄生蟲、 - 四肢走路方式正常、 - 眼耳口鼻冇奇怪分泌、 - 大小便正常等等， 如果發現有異樣先會帶去獸醫診所再作進一步檢查。
單單觸診當然冇辦法排除內在隱疾，例如:
1. 潛伏腫瘤 標準為冇明顯突起及於一個月內變大， 由於刺蝟確診腫瘤一來要睇下有冇明顯變異, 二來要拮針抽樣本再去化驗
先有機會可以確診良性惡性/係咪真係腫瘤， 基於刺蝟係清醒時其實幾乎唔可以拮針入去抽樣本(亦不人道)，所以過程必須要麻醉，亦都因為呢個原因，
如果我地係一個月內觀察懷疑腫瘤位置冇變異
就唔會進行此類測試
有關腫瘤，尤其口腔腫瘤，事關每隻刺蝟頭型都唔同，
如果佢兩邊小小突起而對稱，我地好難定性佢為腫瘤，
加上進食正常的話我地會定性佢冇問題。 當然明顯腫脹，甚至腫脹位置有潰瘍，
佢健康檢查就一定唔合格，唔適合去新屋企
2. 牙齒問題 門牙部分刺蝟都可以看到，
但大牙一般比較困難，很多完全觀察不到，
所以詳細口腔檢查刺蝟需要全身麻醉甚至頭骨ｘ光
同上，過程必須要麻醉，亦都因為呢個原因，
如果我地係一個月內觀察認為冇問題
就唔會進行此類測試。
3. 心臟病 要確診心臟病其實除左聽心臟聽到問題之外，
好多時要配合X光睇下個心型有冇變大，
而係冇病徵既情況之下---
講緊呼吸正常力度，速度及沒有雜聲的情況之下我地為之合格， 就唔會帶去醫院全麻檢查。
4. 器官問題，例如肺，肝，腎等等 要知道內在有冇內在問題，
其實真係要驗血睇一睇啲指數有冇高低奇怪、
X光睇一睇有冇器官發大，陰影。
觸診上除非明顯腫、硬，否則亦不準確。
由於佢地唔會乖乖地比我地拮針抽血，
更唔會乖乖地扒係到照Ｘ光，所以不幸地亦要全身麻醉。
係一隻外觀正常嘅刺蝟身上，我哋唔希望咁樣進行全身麻醉，所以本會不能排除刺蝟身體內部隱疾問題，
所以抱歉，呢啲就係我地既局限，
呢啲問題我地真係會pick up 唔到。
至於一個月內其實義工可以觀察到幾多？
坦白講可能唔夠新主人養半個月睇到噤多。
先莫講所有義工有正職（如果唔係協會根本營運唔到），
其次係我地照顧緊數十隻刺蝟，高峰期多達二十多隻，
當中更有正在患病及治療的小朋友，
無論我地幾盡力都好，始終做唔到一對一，
亦即係細緻的問題我地好難留意到，只要刺蝟:
1. 食野餵口正常 2. 大小便正常 3. 冇乞痴咳流鼻水 4. 血色素良好 5. 冇脫水 6. 皮膚冇皮屑冇異樣 7. 冇皮膚寄生蟲 8. 體型體重正常 9. 呼吸正常力度, 速度及沒有雜聲
以上標準全部達標，我地就定性為合格，會安排去新主人屋企。
但請注意！並不代表那隻刺蝟一定100% 健康，
因為就以上所講，
1. 潛服腫瘤 2. 牙齒問題 3. 心臟病 4. 器官問題等等
係冇表徵既情況之下基本我地就唔會留意到，
亦唔會驅使我地同佢全身麻醉去X光驗血，
故此亦不能保證呢四項完全冇事。
如果以上９項檢查新主人覺得唔足夠的話，
可能領養後都要帶去獸醫再body check
或者要去其他比我地更細緻地方領養。
希望呢篇野可以幫到更加多有意領養既主人了解本會運作及對刺蝟健康程度的期望，感謝😊
Facebook 原文:
Kommentare